ކުރީގެ ލީޑަރުން ދައުލަތުގެ ގޭގެއިން ނިކުތުމަށް  ސްރީ ލަންކާގެ ވާތުފިޔައިގެ ސަރުކާރުން އަންގައިފިއެވެ، ކުރީގެ ނުފޫޒުގަދަ ރާޖަޕަކްސާ އާއިލާގެ މެންބަރުންނާއި އެހެނިހެން ކުރީގެ ރައީސުން ދައުލަތުގެ އަގުބޮޑު ގެތަކުން ވަގުތުން ނުކުތުމަށް. މި ނިންމުމަކީ ސަރުކާރުގެ ޚަރަދުތައް ކުޑަކުރުމަށާއި ކުރީގެ ވެރިންނަށް ދެމުންއައި އިމްތިޔާޒުތައް މަދުކުރުަ ކުރުމަށް އަޅާފައިވާ ފިޔަވަޅެކެވެ.

އިންފޮމޭޝަން މިނިސްޓަރު ނަލިންދާ ޖަޔަތީސާ ވިދާޅުވި ގޮތުގައި، މި ގެތައް އަޕްމާކެޓް ބޫޓިކް ހޮޓަލްތަކަށް ނުވަތަ މިއުޒިއަމްތަކަށް ބަދަލުކުރުމަށް ވަނީ ނިންމާފައެވެ. މީގެ އިތުރުން، ކުރީގެ ވެރިންނަށް ދެން ދޭނީ ކުލީގެ އެލަވަންސެއްގެ ގޮތުގައި މަހަކު 107 އެމެރިކާ ޑޮލަރެވެ. މިއީ 1986 ވަނަ އަހަރު ފާސްކޮށްފައިވާ ޤާނޫނެއްގެ ދަށުން އެ ފަރާތްތަކަށް ލިބިދޭ ޙައްޤެއް ކަމަށް ވެސް އޭނާ ފާހަގަކުރެއްވިއެވެ.

މި ނިންމުމުގެ ސަބަބުން އެންމެ ބޮޑު އަސަރެއް ކުރާނެ ފަރާތްތަކުގެ ތެރޭގައި ކުރީގެ ރައީސް މަހިންދަ ރާޖަޕަކްސާ ހިމެނެއެވެ. އޭނާ މިހާރު ދިރިއުޅުއްވަމުން ގެންދަވަނީ މަހަކު 16،500 އެމެރިކާ ޑޮލަރު (4.6 މިލިއަން ރުޕީސް) އަގުހުރި ސަރުކާރުގެ ގެއެއްގައެވެ. މިއީ ރަސްމީ ގޮތުން ޙައްޤުވާ މިންވަރަށްވުރެ 150 ގުނަ ބޮޑު އަދަދެކެވެ.

މިނިސްޓަރު ޖަޔަތީސާ އިތުރަށް ވިދާޅުވި ގޮތުގައި، މުސްތަޤުބަލުގައި ކުރީގެ ރައީސުންނަށް ނުވަތަ އެ ފަރާތްތަކުގެ އަނބިން/ފިރިންނަށް ސަރުކާރުން ބޯހިޔާވަހިކަމެއް ނުދޭނެއެވެ. އޭގެ ބަދަލުގައި އެ ފަރާތްތަކަށް ލިބޭނީ ޕެންޝަންގެ ތިންބައިކުޅަ އެއްބަޔާ އެއްވަރުގެ ކުލީ އެލަވަންސެއް ކަމަށްވާ 30،000 ރުޕީސްއެވެ.

މި ނިންމުމަކީ ސްރީ ލަންކާގެ މިހާރުގެ ރައީސް އަނޫރާ ކުމާރާ ޑިސަނަޔަކަގެ ސަރުކާރުން ކޮރަޕްޝަނާ ދެކޮޅަށް މަސައްކަތް ކުރުމަށް ވެފައިވާ ވައުދުގެ ބައެއްގެ ގޮތުގައި ބެލެވެއެވެ. މީގެ ކުރިން ވެސް ސަރުކާރުން ވަނީ ކުރީގެ ލީޑަރުންގެ ސެކިއުރިޓީ މުވައްޒަފުންގެ އަދަދު މަދުކުރުން ފަދަ ފިޔަވަޅުތަކެއް އަޅާފައެވެ.